МЕМЛЕКЕТ БАСШЫСЫ РЕФОРМАЛАР ЖӨНІНДЕГІ ЖОҒАРЫ КЕҢЕСТІҢ КЕЗЕКТІ ОТЫРЫСЫН ӨТКІЗДІ

Толығырақ

2021 жылғы 24 қыркүйекте Реформалар жөніндегі жоғары кеңестің кезектіотырысында ұлттық жобаларды әзірлеу, тиімді тауар өткізу жүйесін қалыптастыру, экспортты ілгерілету жөніндегі шаралар және аумақтық даму жоспарының жобасы қаралды.

Стратегиялық жоспарлау және реформалар агенттігінің төрағасы Қайрат Келімбетов Ұлттық жобалар бойынша атқарылған жұмыстар туралы баяндама жасады.

Баяндаманы мұқият тыңдаған Мемлекет басшысы кеңестің өткен отырысында ұлттық жобалардың тізімі мақұлданғанын және оларды қаржы жағынан қамтамасыз ету, қорытынды нәтижелердің шынайылығы және ауқымдылықты болдырмау тұрғысынан пысықтау тапсырылғанын еске салды.

Қасым-Жомарт Тоқаев жеке инвестицияларға қатысты мәселені де қозғады. Оның айтуынша, ұлттық жобаларды қаржыландыруға қажетті 49 триллион теңгенің 33 триллионы немесе жалпы соманың 67 пайызы бюджеттен тыс қаражатқа тиесілі.

Ол бүгінгі талқылауды ескере отырып, ұсынылған ұлттық жобаларды жалпы мақұлдауды ұсынды. Үкіметке тиісті қаулыны екі апта ішінде қабылдауға тапсырма берілді.

Бұдан әрі тиімді тауар өткізу жүйесін қалыптастыру мәселесі қаралып, ол бойынша Сауда және интеграция министрі Бақыт Сұлтанов баяндама жасады.

Баяндаманы тыңдаған Қасым-Жомарт Тоқаев шикізаттық емес экспортты ұлғайту Үкіметтің күн тәртібіндегі аса маңызды мәселе екенін атап өтті. Оның пікірінше, экспорттық кедергілерді алып тастау, экспорттың географиясы мен номенклатурасын кеңейту, ұлттық экономикалық мүдделерді қорғау бүкіл Үкіметтің ортақ күш-жігерін талап етеді. СІМ және оның шет елдердегі мекемелері экспортты ілгерілету, нарықтарды ашу және тосқауылдарды алып тастау жөніндегі күш-жігерге белсенді қосылуға тиіс.

Аумақтық даму жоспарының жобасымен жұмысы туралы Әсет Ерғалиев есеп берді.

Қазақстан Президенті Ұлттық экономика министрін тыңдап, Жоспар бүкіл елді ұтымды аумақтық ұйымдастырудың базалық қағидаттары мен тәсілдерін ғана емес, сондай-ақ әрбір өңірді дамытудың негізгі параметрлерін де қамтуға тиіс екенін атап өтті.

Сондай-ақ, жиында «Атамекен» ҰКП төралқа төрағасы Тимур Құлыбаев және Президенттің экономикалық даму мәселелері жөніндегі штаттан тыс кеңесшісі, Реформалар жөніндегі кеңес төрағасының орынбасары Сэр Сума Чакрабарти сөз сөйледі.

Дереккөз: https://www.akorda.kz/ru/glava-gosudarstva-provel-zasedanie-vysshego-soveta-po-reformam-2483156