04.03.2015 Есеп комитетінің Төрағасы Қозы-Көрпеш Жаңбыршин «2015 жылдан кейінгі БҰҰ-ның даму күн тәртібі: орнықты дамуды қамтамасыз ету үшін жоғары қаржы бақылау органдарының рөлі» деген тақырыппен 2015 жылғы 2-4 наурыз аралығында Вена қаласында (Австрия)

Толығырақ

Аталған іс-шара БҰҰ-ның Бас хатшысының орынбасары Ву Хонгбоның, әлемнің 75 елінің, соның ішінде АҚШ, Ұлыбритания, Польша, Қазақстан, Оңтүстік Африка Республикасы, БАӘ, Оңтүстік Корея жоғары қаржы бақылау органдары басшыларының, сондай-ақ БҰҰ және бірқатар басқа да беделді халықаралық ұйымдар өкілдерінің қатысуымен өтті. Симпозиум отырысын Австрияның Федералды Президенті Хайнц Фишер ашты.

Қатысушылар мемлекеттердің әлеуметтік-экономикалық дамуына жәрдемдесу мақсатында бюджет қаражатының тиімді және ашық пайдаланылуын қамтамасыз етудегі жоғарғы қаржы бақылау органдарының (ЖҚБО) рөлін талқылады.

2015 жылдан кейінгі БҰҰ-ның Даму күн тәртібін және БҰҰ-ның орнықты даму мақсаттарын дайындау шеңберінде ЖҚБО-лардың мемлекеттік басқарудағы ашықтықты және тиімділікті қамтамасыз ету мәселелеріне неғұрлым белсенді қатысу маңыздылығы атап өтілді.

ЖҚБО-лар қызметінің тиімділігін арттыру жолдары, аудиторлық қорытындылар мен ұсынымдарды дайындау әдістемелерін жетілдіру мәселелері қаралды.

ЖҚБО-лардың әлеуетін арттыру, мемлекет қаржысының тиісті деңгейде басқарылуын қамтамасыз ету, сондай-ақ бюджет қаражатын пайдалану кезінде сыбайлас жемқорлыққа және алаяқтыққа қарсы тұру мақсатында мемлекеттік аудиттің маңызды теориялық мәселелерін бірлесіп әзірлеу бойынша ИНТОСАИ-ға қатысушы елдер ЖҚБО-ларының өзара іс-қимылын дамыту қажеттігі атап өтілді.

Жұмыс қорытындысы бойынша орнықты дамуды қамтамасыз етудегі жоғары қаржы бақылау органдарының рөлін күшейту бойынша нақты келісілген ұсыныстар жасалды.

Симпозиум шеңберінде Қозы-Көрпеш Жаңбыршин Әзірбайжан, Белорусь, Үндістан, Индонезия және Нидерланды жоғары қаржы бақылау органдарының басшыларымен екіжақты келіссөздер жүргізді. Кездесу барысында тараптар екіжақты тарап негізінде, сол сияқты халықаралық ұйымдар шеңберінде де ынтымақтастықты реттеуге және дамытуға қызығушылық білдірді. Нидерланды Есеп сотының вице-президенті Арно Виссермен әңгімелесу барысында Есеп комитеті қызметкерлерінің біліктілігін арттыру және халықаралық аудит стандарттарын қолдану тәжірибесімен алмасу мәселелеріне ерекше назар аударылды.

БҰҰ/ИНТОСАИ СимпозиумыБҰҰ-ның қолдауымен 1971 жылдан бастап, екі жылда бір рет өткізіледі. Іс-шараның ұйымдастырушы – ИНТОСАИ-дың Бас Хатшылығы.

БҰҰ (Біріккен Ұлттар Ұйымы) – халықаралық бейбітшілік пен қауіпсіздікті қолдау және нығайту, мемлекеттер арасындағы ынтымақтастықты дамыту мақсатында құрылған халықаралық ұйым.

ИНТОСАИ - 190 елдің жоғары аудит органдарының халықаралық ұйымы, Есеп комитеті оның құрамына 2000 жылғы мамырда қабылданды.

Есеп комитетінің баспасөз қызметі